Virginia Woolf

Meviele suteté ta kofolira ok puvera. ~ Virginia Woolf

Adeline Virginia Stephen ba 25/01/1882 koe London koblir. Nazbeikya ke Leslie Stephen kotgrupaf tanizvik is trakuropik, gan gadikye va akvavansafa gaanyara kazawar, lize gruadafa rilituca zo bristur. Bata vola ke grupelaf is ginukaf is mivlanaf gadik, va blira ke nazbeikya arton tcalar.

Bak 1895, tison sanbardafa, Virgina va gadikya drasur. Bata awalkera va inafa ranafa swavamilbava vilar aze in ko oviskuca abicugale flaydur. Moi awalkera ke gadikye bak 1904, Virginia va kot prist va nizdebliakolaf swavaz tolon exaksar. Do Vanessa berikya is toloye berikye ko Bloomsbury revava koe London inkewer. Batlize Bloomsbury rijay tazukawer, metazukafa lospa dem gruadik va sint fereon kagrupes, koeon tir Leonard Woolf rietovik kuretes va Virgina bak 1912.

Sutera, wetce exava blidana, bak 1905 koe suterotafa loaca ke Times fela bokawer. Dison va pofa anda, Virginia Woolf va yona rolona isu plukewera me naler. Varabliron, mu gropa ke ayikyeem lyumar. Mali 1910 mu ayikyafa liburaroka vilter.

Bak 1917, do kurenik va Hogarth Press piskuratretca redur, dana va targafa estova di tadler ise askir da vanmiae konaktan T.S. Eliot is Katherine Mansfield zo gruped. Va The mark on the wall berpotam ( 1917 ) isu Kew Gardens azu Night and Day ( 1919 ) sanegar, ise wal nikeem is yona koyara is kobara ke sutesik is piskusik va tegirafa blira dikir.

Jacob’s room berpot bak 1922 zo sanegar. Bat berpot katectar da in va tuwarzasa kobara icde berpotbunyera bokar. Virginia va nega liper ise sol gimbaf pwaderavexaleem va int tunuyar. Tuelimar : "sutesik trakur da va skujera ik buska is folva ik rena is siva ke rotisuca godafur, va kote donarison jonte kiewon da ede kota brucka co tublisawer kale ironokaf tialt co tir cavavagekiranyaf. Blira tir bata ? Kas berpot batinde gotid ?".

Bak 1925 is 1927 Virginia Woolf va toloy grot sanegar : va Mrs Dalloway is To the lighthouse. Va berpotafe brube bam tulodaludevar ise ko suteroteem nijur tana lorukuzafa is logustafa puda. The waves bak 1931 zo sanegar ise gan jontiktan zo emudenyer. Radimi tevda, va « bata merodolunyena armorafa sutera » koe The Years belisik toltrasir.

Dile kosaf gu blirakolaca, va in vebesa, in lwir da ben grabom dum kup modemar. Voxe ba 28/03/1941, mo baza ke kurenik Virginia Woolf va twa aykar : « Tí lanaf da fu tuoviskawé : pestalé da va armana rekolaja rotabitit. Pestalé da batviele me roranyá. Tozú da va yona puda gildé ise va int me grupistá. Batdume askí inde gonaskinon folí. Pu jin va tela kalapuca al zilil… Mea rovelyumá, grupé da va rinafa blira kalgrebé, da voldo jin co rokobal. »

In va Between the acts intaf nubasuteks kopiuter aze kan yon rapor ucomkopler aze poke intafa mona ko Ouse kuksa va int mimar. « Va jin kle iskec, dum rumeik lebanugon abdulanis ko fentafa kuksa, ware titlanis va lava ».